水涵头唇介老榕树
作者：陈宁贵
《客语诗》
有一头老榕树
听说对阿公以前介阿公时节
百过年前就生在水涵头唇
大人伫介撂凉唱山歌
细人伫介跋上跋下
佢系者兜小山狗仔介游乐园
有人用索仔做晃晃
晃来归热天介凉风同欢喜
十八岁介年我离乡后
只有在发梦中
正会伫佢熟识介身项跋上跋下
有时转老屋家才会去寻佢聊
像睹到老朋友
佢用胡须拍我的肩头
用树叶仔摸我介头那
有一日我尽畅转去
老榕树怎会唔见忒
存到硬颈介老树根
狠狠揽住头摆古老介地泥
我盖像听到当时
斧头在佢身项凿出哀嚎
锯子逼佢溅出
同目汁共样介飞屑
再过半年后
介老地迹生出
一头唔会喊唔会笑
我从来唔识介
大楼房